t Evengelie volgens Matteüs 24
01Jezus kwam tou tempel oet en ging wieder. Zien leerlingen kwammen noar hom tou en wezen hom op tempelgebaauwen.
02"Kiek joe dat altmoal ais aan," zee Jezus tegen heur. "Mor neem van mie aan: gain stain dervan zel op n aander liggen blieven. Ales gaait tegen de vlakte!"
03Op Olievenbaarg ging e zitten en zien leerlingen kwammen bie hom. Dou ze mit hom allain wazzen, vruigen ze: "Nou mout ie ons toch ais vertellen wanneer dat dat wezen zel en woar of je aan zain kinnen dat ie weer kommen en dat wereld op t èn lopt."
04"Wees ter op verdocht dat gainent joe wat wiesmoakt," was Jezus zien antwoord.
05"Der zellen hail wat kommen onder mien noam en zeggen: 'Ik bin de Christus.' Doar zellen ze hail wat lu mit op biesterboan brengen.
06Ie zellen van oorlogen en van proat over oorlogen heuren. Mor loat joe nait oetstuur brengen. Dat mout altmoal gebeuren, mor t èn is dat vot nog nait.
07t Aine volk zel ja tegen t aander in opstand kommen en t aine keunenkriek tegen t aander. Der zellen hongersnoden wezen en eerdbevens, nou hier en den doar.
08Mor dat is altmoal nait meer as t begun van ale ellèn.
09Den zellen ze joe onder drok zetten en doodmoaken. Ale volken zellen joe mit n schaive nek aankieken omreden ie kommen veur mie oet.
10 En den zellen n bult mensken t opgeven, nkander verroaden en hoaten.
11 Den zellen veul vaalze profeten aantreden dij mensken op t verkeerde pad brengen.
12 En omdat t levent zunder god of gebod aal meer aanwazen dut, zel laifde onder mensken kold worden.
13 Mor wèl volholdt aan t èn tou dij zel red worden.
14 Bliede bosschop van t keunenkriek zel over haile wereld bekend moakt worden as n getugenis veur ale volken. En den zel t èn der heer wezen.
15 As ie den in dizze haailege stee 'iezelke ofbroak' stoan zain, profeet Daniël het t ter over had, - en wèl of t leest, mout goud acht geven -
16 den mouten lu dij in Judea touholden, baargen in vluchten.
17 Wèl of op t platdak van zien hoes touholdt, mout nait ommeneden kommen om zien hoesgroad op te hoalen.
18 Dij boeten op t laand is, mout nait weeromkommen om zien jak op te hoalen.
19 Aarme stumpers van vraauwlu dij in dij doagen in verwachten binnen of n lutje aan bòrst hebben!
20 Beed mor gaauw dat t gain winter of sabbat is as ie aan hakken trekken mouten.
21 Want t zel der n big om weg goan, zo as wereld nog nooit mitmoakt het van t begun òf, aan nou tou. En zo slim zel t ook nooit weer worden.
22 As dij doagen nait inkòrt worden zollen, gain mensk zol t ter ofredden. Mor om heur dij oetkeurd binnen, zellen dij doagen inkòrt worden.
23 Leuf t mor nait, as ain tegen joe zegt: 'Kiek, hier is de Christus,' of: 'Doar is e.'
24 Der zellen ja hail wat lu kommen dij beweren dat ze de Christus binnen, of n profeet. Grode taikens en wonders zellen ze doun om, as t aaids meugelk wezen zol, alderdeegs dij oetkeurd binnen op biesterboan te brengen.
25 Paas op! Ik heb joe aaltied al woarschaauwd!
26 As mensken tegen joe zeggen: 'Kiek es, hai is in woestijn,' goa doar den nait hèn. Of as ze zeggen: 'Kiek es, hai is doar in hoes,' leuf der den niks van.
27 t Zel mit Menskenzeun zien komst krekt zo goan as t mit weerlicht gaait. Dij komt oet t oosten en in t westen zai je hom nog.
28 Overaal doar n dood daaier ligt, doar kommen gieren mitnkander op òf.
29 Votdoalek noa ale kripsie van dij tied zel zun duuster worden, moan zel nait laanger schienen, steerns zellen van hemel ofvalen en hemelse machten wibberg worden.
30 En den zel Menskenzeun zien taiken aan lucht te zain wezen. Ale volken op eerde zellen jammern en jeuzeln en ze zellen Menskenzeun kommen zain op wolken van hemel, mit grode macht en stoatsie.
31 Grode bezuun zel klinken en hai zel zien engels oetsturen. Dij zellen dij e oetkeurd het, bie nkander brengen oet ale vaaier windstreken vandoan, van t aine èn van wereld aan t aander tou.
32 Ie mouten van geliekenis over viegeboom dizze les leren: As dij zien toeken waik worden en knoppen oetkommen den wait ie: nou is zummer nait wied meer vot.
33 Zo mout ie ook waiten as ie dat altmoal gebeuren zain: t staait veur deur!
34 Ik verzeker joe: dizze generoatsie zel dat altmoal nog beleven.
35 Hemel en eerde zellen vergoan. Mien woorden vervaast nait!
36 Mor wanneer of dij dag of dat uur kommen zel dat wait gainain. Engels in hemel nait, Zeun nait, mor allain de Voader wait t.
37 En zo as t ter aan tou ging in Noäch zien tied, zo zel t ter ook heer goan as Menskenzeun komt.
38 In tied van grode vloud gingen lu rusteg deur mit etendrinken, manlu nammen n vraauw, vraauwlu kregen n man, aan dag tou dat Noäch tou aark inging.
39 Ze huilen naargens reken mit, tot grode vloud lösbrook en heur altmoal votspoulde. Krekt zo zel t goan as Menskenzeun komt.
40 Den zellen der twij op t laand touholden: ain zel mitnomen worden, aander achterloaten.
41 Twij vraauwlu zellen aan t moalen wezen: aine zel mitnomen worden, aander achterloaten.
42 Doarom: blief woakzoam! Ie waiten ja nait op wat veur dag joen Heer kommen zel.
43 Ie mouten hier mor om denken: as boas van t hoes waiten haar hou loat of daif kommen zol den was e wel wakker bleven en haar e nait in zien hoes inbreken loaten.
44 Doarom mout ie ook kloarstoan. Menskenzeun komt ja op n tied doar ie der nait op reken.
45 Welke knecht is nou zo traauw en verstandeg dat zien boas hom over t waarkvolk aanstellen kin om op tied veur heur gerak te zörgen?
46 Dij knecht mag van gelok spreken as zien boas as e thoeskomt, zugt dat zien knecht doar dounde mit is.
47 Ik verzeker joe: zien boas zet hom over aal wat e het.
48 Mor as knecht nait deugt en bie zokzulm denkt: 'Boas komt nog lange nait thoes,'
49 en hai begunt aander knechten te sloagen en mit klokjebruiers te vreten en te zoepen,
50 den komt dij knecht zien boas net op dag dat e zoks nait verwachten dee en net in t uur dat e nait wos.
51 Boas zel hom den n flink pak laaiter geven en hom stee aanwiezen bie mooiweerspeulers. Doar zellen ze hoelen en mit tanden knaarzen!
|
